ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានស្នើទៅដល់ក្រសួងអប់រំឲ្យធ្វើការសិក្សាអំពីមូលហេតុអ្វីបានជាសិស្សប្រុសដែលជាប់សញ្ញាបត្របាក់ឌុបមានចំនួនតិចជាងសិស្សស្រី។

សម្ដេចលើកឡើងថានេះ គឺជាកង្វល់មួយដែលសិស្សប្រុសបែរទៅជាមានចំនួនតិចតួចបើធៀបទៅនឹងសិស្សដែលបានជាប់បាក់ឌុប។

សម្ដេចថា៖ «វាដាច់គ្នាឆ្ងាយណាស់! វាទៅមួយជាពីរ»។

រដ្ឋមន្ត្រីអប់រំលោក ហង់ ជួនណារុន បានឡើងមកឆ្លើយតបទៅនឹងសម្ដេចតេជោ ថានេះគឺជានិន្នាការសាកលទៅហើយ ដែលសិស្សប្រុសជាប់បាក់ឌុបតិចជាងស្រី ខណៈសម្ដេចថាសម្ដេចមិនសូវមានជំនឿថាជានិន្នាការសកលទេ ដោយបារម្ភថាថ្ងៃណាមួយអាចនឹងគ្មានសិស្សប្រុសជាប់និទ្ទេស A។

សម្ដេចតេជោលើកឡើងបែបនេះនៅក្នុងពិធីជួបសំណេះសំណាលជាមួយនឹងសិស្សនិទ្ទេស A និងការប្រឡងសញ្ញាបត្របច្ចេកទេសនិងវិជ្ជាជីវៈកម្រិត ៣ ឆ្នាំ២០២២ ព្រឹកថ្ងៃទី២ ខែកុម្ភៈ ឆ្នាំ២០២៣ នៅសាល OCIC ជ្រោយចង្វារ៕